නිව්යෝක් විලාසිතා සතිය හෙල්ලු දහ නව හැවිරිදි යකඩ සමනලිය

හීන.. අපි හැමෝටම අපිටම කියලා සන්තක වෙච්ච හීන තියෙනවා..ගෑණු ඉපදෙන්නෙම මිටි ගනන් හීන පොදි බැඳගෙන.ඒත් අපි මිටි ගහගෙන උපන්න හීන වලින් අපි ජීවත් වෙච්චි කාලය ඇතුලත කීයක් නම් හීන සැබෑ කරගන්න පුළුවන් උනාද කීයක් නම් හීන ..හීනයක් විතරක්ම වෙලා ඔහේ වැලලිලා ගියාද කියලා ඔබේ ඇතුලු හදෙන් අවංකවම ප්‍රශ්න කරලා බැලුවොත් හිත සනසගන්න පුළුවන් තරමේ උත්තරයක් හොයා ගන්න පුළුවන් වෙන්නේ කීයෙන් කී දෙනාටද..

fb- like-beg


අපි විහින්ම පොත්ත පාට, ලස්සන , කැත,  ජාතිය,  කුලය , දුප්පත්,  පෝසත් වගේ කිසිම වැදගැම්මකට නැති වැට කඩුළු පෝලිමක්  බැඳගෙන නිදහසට කරුනු කාරණා හදාගෙන අපේ හීන උපන්ගේම වලලා දාද්දි තමුන්ට මොනදේ සිද්ධ උනත් තමුන්ගේ හීනෙට යන්න හයිය තියෙන යකඩ ගැහැනුත් මේ ලෝකේ නැතිවාම නෙවෙයි.ඒ වගේ ගැහැනුන්ගේ කතා ඇතැම් විට ඔබේ හීනෙට යන්න ඔබට අඩුපාඩු වෙලා තිබ්බ ධෛර්ය ඌන පූරණය කරාවි.

රේශ්මා කුරේශි බානු කියන්නේ තාමත් ගැටවර වයසේ පසු වූනාට වයසට වඩා හිත හයිය යකඩ කෙල්ලක්.රේශ්මා උපදින්නේ ඉන්දියාවේ මුම්බායේ, ටැක්සි රියදුරෙකුට දාව පවුලේ බඩපිස්සිය ලෙසිනුයි.ගැටවර වියේ එලිපත්තේ උන්නු රේශ්මටත් ඔබට මට වගේම කප්පරක් හීන තිබ්බ.සමනළියකට වගේ සැහැල්ලු ජීවිතයක් තිබ්බා.ඈ දවස පුරාම කත්රිනා කයිෆ් ගේ චිත්‍රපට බැලුවා..ඒ විදියට කොන්ඩේ පීරුවා.ඇඳුම් ඇන්දා.කවම කවදාහරි නිරූපිකාවක් වෙලා බොලිවුඩයේ තරු අතරේ දිලිහෙන්න ඈටත් හීනයක් තිබ්බා.

ඒත් මීට වසර දෙකකට පෙරාතුව එකමත් එක දවසක ඇගේ  ජීවිතයම කනපිට පෙරලලුනා. ඇගේ මස්සිනා අතින්  ඈ ඉතා අවාසනාවන්ත ලෙස ඇසිඩ් ප්‍රහාරයකට ගොදුරු වුනේ ඇගේ 10 වසර ප්‍රවේශ විභාගයට යන අතරමගදීයි.ඇගේ සියළු සිහින දැවී අලුවෙද්දී ඇයට ලෝකය දකින්නට ඉතුරු වුනෙත් එක් ඇසක් පමණයි.

ඒත් ඉතුරු උනු එක ඇසින් පවා  රෙශ්මා ආපහු හීන බලන්න පටන් ගත්තා.. “Make Love Not Scars” NGO සංවිධානයේ  රියා ශර්මා එක ඇසින් ලස්සන ලෝකයක් දකින්න රෙශ්මට හයිය එකතු කරලා දුන්නා. ආපහු ආපු රේශ්මා ඊළගට අඩිය තියන්නේ නිරූපණ ක්ෂේත්‍රයට.ඈ හරි හරියට අනෙකුත් ජේත්තුකාර සුරූපිනියන් එක්ක එකම වේදිකාවක් උඩ  හිට ගන්නවා.අභිමානයෙන් යුතුව සිය තනි ඇස් පියන් පත ඔසවලා ලෝකය දෙස බලා සිටිනවා.සියල්ල සිදුවුනේ යහපතටයි කියලා ඈ තරයේම විශ්වාස කරනවා.ඈ කිසිවක් ගැන බිඳක් වත් පසුතැවිලි වෙන්නේ නෑ.අතීතයේ අඳුරු ලප වසාගෙන ඈ සඳක් මෙන් දීප්තිමත්ව බැබලෙනවා.ඇසිඩ් ප්‍රහාරයක ගොදුරක් ලෙස ඈව හඳුන්වනවාට පවා රේශමා අකමැතියි.එසේම ඇය කිසිවිටකත් මුහුණ වසාගෙන තම පිලිස්සුනු මුහුන ලෝකයාගෙන් සඟවා ගත්තේ නෑ.ඒ වෙනුවට ඈ වෙනදාටත් සුන්දරව වඩාත් විශ්වාසයෙන් යුතුව ලෝකයා හමුවේ පෙනී සිටිනවා

“මම එතනින් එළියට ඇවිත් ඉවරයි.ඉතිං එහෙනම් මං කොහොමද තවදුරටත් ගොදුරක් වෙන්නේ.ඇත්තටම මට දැනෙන්නෙ මං ඉස්සරටත් වඩා හුඟක් ලස්සනයි කියලා.ඒ සිදුවීම මාව ලස්සන කියන වචනයේ නව මානයකට අරන් ගියා.ලස්සන විය යුත්තේ ඔබගෙ පෙනුම නොවෙයි ඔබගේ හදවතයි..”

රේශ්මට දැනෙන දේ ඇගේම වචන වලින් ඈ ලෝකයා හමුවේ ප්‍රකාශ කලේ එහෙමයි.

කවුරුන් කෙසේ කොයි ලෙසක කීවත් ජීවිතයේදී තම හිස මතට වැටි කිසිවකින් නොසැලි තම හීන පසුපස්සෙන් පියාසර කර රේශ්මා කුරේශි බානු නම් වූ සමනලිය, නැවත නැවතත් තමුන් මේ ජීවිතය දිනා ගත් වග ලෝකයට සපත කරනු ලැබුවා. පසුගියදා අවසන් වූ නිව් යෝර්ක් විලාසිතා සතියේදී සුරූපි සනී ලියෝන් හා හරි හරියට හැඩවී වේදිකාව  මත සිටගත් ඈ ලෝකයේ දහසකුත් එකක් කතුන්ගේ උපන්ගෙයිම මියදෙන සිහින වලට පණ දෙන්නට අවැසි ධෛර්ය ඔවුනගේ කේශාන්තයේ සිට පාදාන්තය දක්වාම කාන්දු කරවූයේ අනෙකෙකු නොව තමාවම ජීවමාන නිදසුනක් ලෙස ගෙන හැර දක්වමිනි


SHARE

NO COMMENTS

LEAVE A REPLY